Cuma künü, aprel 24-de, Krasnodarda qırımatatarlarnıñ milliy yetekçisi Mustafa Cemilevniñ oğlu Hayser Cemilevniñ işi boyunca nevbetteki mahkeme toplaşuvı keçti. Toplaşuvda mahkemeci olmağanlar bulunmadı.
Bunı advokat Nikolay Polozov bildire.
«Cemilevniñ işi boyunca mahkeme toplaşuvında mahkemeci olmağanlar bulunmadı. Qabaatlayıcı taraf yazma delillerni, imaye – çıqaruv arizasını bildirgenler», – yazdı o twitterde.
Onıñ aytqanına köre, mahkemeniñ nevbetteki toplaşuvı aprel 27 künü keçecek. Bu küngece Krasnodar diyarınıñ mahkemesi teneffüsni ilân etti ve «taraflarnıñ muracaatı boyunca protsessual qararnı almaq içün ketti»
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
