İnsan aqaları boyunca Kontakt gruppasınıñ reisi, uquq qoruyıcı Emir-Üsein Kuku aprel 20 künü Yaltada yaqalanğanından olğan aqibetlerni kösterdi.
Uquq qoruyıcı Facebookta yararlarnıñ fotosı ve tedaviylevge tibbiy yollanmanı aşkâr etti.
«Yaqalavdan» olğan beden yararlarım, 4 künlük tüzelüvden soñ», – yaza o.
«Teren nefes almaq, külmek ve aqsırmaq pek ağır, egilmek, aylanmaq, ayaq kötermek de…», – dey Kuku.
Özüniñ izsiz ğayıp ola bilecegini tüşünip, onı qaysı yerde qıdırmağa kerek olacağını bildire.
«Cemaatqa muracaatta bulunam: bir kün izsiz ğayıp olsam, meni Yalta şeeri, Kirova soqağı, 23 adresi boyunca yerleşken FSBde qıdırıñız. Mennen «işlegen» FSB hadimleriniñ ad ve rutbelerini tuvğanlarım ve dostlarımdan alırsıñız, olar bellidir…», – yaza uquq qoruyıcı.
Emir-Üsein Kuku Yaltada aprel 20-de işke ketkende yaqalandı. Onıñ evinde tintüv keçirildi, bilgisayarlar, telefon ve kitaplar alındı. Soñra onı, tahmin etilgeni ki, Yalta uquq qoruyıcı organlarınıñ idaresine alıp kettiler.
Kontakt gruppasınıñ daa bir vekili Mammet Mambetovnıñ Facebookta bergen malümatına köre, Emir-Üsein Kukuğa qarar seslendirildi. Oña binaen, onı Rusiye Federatsiyası Cinaiy kodeksiniñ 282-nci maddesine köre «Duşmanlıq ya da nefret qozğalaması, insan itibarını tüşürüv» kibi cinayette şekleyler.
Uquq qorçalayıcı özüni yahşı is etkenini bildirip, büyrek ağrısı olğanını ayttı.
