Link açıqlığı

Rusiye Yuqarı mahkemesi Ukraina Yuqarı şurası deputatı Mustafa Cemilevniñ oğlu Hayser Cemilevge qarşı cinaiy işniñ Qırımda degil, Krasnodarda baqılması aqqında nezaret şikâyetini Rusiye Federatsiyası Yuqarı mahkemesiniñ preizdiumına bermege razı olmadı.

Bunı cumaaqşamı künü, aprel 23-de, Hayser Cemilevniñ advokatı Nikolay Polozov Twitterinde bildirdi.

Polozovnıñ aytqanına köre, imayesi buña itiraz bildirmek niyetindedir.

«Yuqarı mahkemeniñ mahkemecisi nezaret şikâyetini Prezidiumğa bermege razı olmadı. İşbu qararğa apellâtsion kollegiyasında itiraz bildirecemiz», – dedi o.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.

Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.

Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.

XS
SM
MD
LG