Devlet Dumasınıñ «Spravedlivaya Rossiya» deputatı Oleg Miheyev Moskva yolbaşçısı Sergey Sobâninge resmiy muracaat yollap, metronıñ «Park külturı» durağına «Qırım meydanı» adını bermege teklif ete, dep haber ete TASS.
Deputatnıñ fikirince, böyle etip 2014 senesi olğan vaqialarnı, Rusiyeniñ Qırımnı qabul etüvini, ebediyleştirmege imkân olacaq.
Deputatnıñ aytqanına köre, bunıñnen beraber, tarihiy adalet tiklenecek, çünki qurucılıq esnasında stantsiya «Qırım meydanı» olaraq planlaştırılğan edi.
«Bu leyha adınıñ qaytarılması mantıqlı olur, çünki stantsiya yerleşken Hamovniki rayonında «Qırım» adını taşığan çoq yer bar – Qırım köprüsi, Qırım keçiti, Qırım valı», – dep yaza muracaatta siyasetçi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
