Link açıqlığı

Aqmescitte aprel 23-te saat 11:00-de V.İ.Vernadskiy adına Qırım federal universitetiniñ prezidenti Nikolay Bagrov ile vedalaşuv merasimi başladı. Bagrov aprel 21-de vefat etti. Merasimde «Selsebil» ansambli kemane çala, dep bildire Qırım.Aqiqat.

QFU salonında qoyulğan aliy oquv yurtunıñ sabıq rektorınıñ mevtası ile tabutnıñ yanına adamlar çeçek ve çemberlerni ketireler, olarnıñ arasında «tuvğanlarından», «QFU hadimlerinden», «Priputnikovlar qorantasından, «Qırım Devlet şurasınıñ deputatlarından». Vedalaşmağa kelgenler arasında Qırım deputatları İgor Lukaşev, Petr Zaporojets, QFU rektorı Sergey Doniç, onıñ KİPU zenaatdaşı Fevzi Yakubov bar edi, Qırım Devlet Şurasınıñ reisi Vladimir Konstantinovnıñ kelmesi beklenile.

Tabutnıñ yanında Bagrovnıñ mukâfatları, şu cümleden Ukraina Qaramanlarına berilgen mavı-sarı bayraq ile medal qoyuldı.

Vedalaşuv merasimi saat 13-ke qadar devam etecek. Bagrovnı Aqmescit mezarlığında defn etecekler.

Nikolay Bagrov devamlı hastalıqtan soñ vefat etti. Qırım halq deputatlarınıñ vilâyet şurasınıñ yolbaşçısı olğan edi, 1991 senesi marttan 1992 senesi yanvar ayına qadar – Qırım MSSC Yuqarı Şurasınıñ reisi, 1992 senesi yanvar ayından 1994 senesi fevral ayına qadar – Qırım Muhtar Cumhuriyetiniñ Yuqarı Şura reisi. Qırımnıñ ilk Anayasasınıñ müelliflerinden biri.

Bagrov Qırım Cumhuriyetiniñ Prezidenti vazifesine namzet kösterilgen edi. 2006 senesine qadar QMC Yuqarı Radasınıñ deputatı edi.

1999 senesinden başlap V.İ.Vernadskiy Tavriya milliy universitetiniñ rektorı olıp çalıştı.

2002 senesi Bagrov knâz Yaroslav Mudrıy V derece nişanını aldı, 2007 senesi ise Ukraina Qaramanı oldı.

O, «Maydan inostrannıh del» tizgen «Qara cedvelniñ» birinci beşligine kirdi. Bu cedvelge kirsetilgen insanlarnı yarımada işğaline yardım etkenleri içün Ukraina Qaramanı unvanından marum qaldırmağa teklif etken ediler.

XS
SM
MD
LG