Cumaaqşamı künü, aprel 23-te, Aqmescitte qırımlı Aleksandr Kolçenkoğa Rusiye vatandaşlığını zornen berüv ile bağlı adliyeciniñ apellâtsion şikâyetini baqacaqlar.
Bunı AÇK-Moskva cemaat teşkilâtı bildirdi.
Mahkeme Aqmescitteki Pavlenko, 2 adresi boyunca Qırımnıñ Yüksek mahkemesinde saat 15:30-da ötkerilecektir.
Qırım faali Aleksandr Kolçenko Avropa İnsan aqları mahkemesine oña Rusiye vatandaşlığı zornen berilgeninden şikâyet etti.
Kolçenkonıñ Strasbourg mahkemesine bergen şikâyetinde aytıla ki, Rusiye vatandaşı olıp, onıñ halqara uquq imayesine aqqı yoq oldı. O, Rusiyeniñ Qırım işğalinden soñ yarımadanıñ diger sakinlerine berilgen Rusiye vatandaşlığına itiraz bildire.
Ukrain ombudsmeniniñ ofisi Ukraina Migratsion hızmetiniñ Kölçenkonıñ Ukraina vatandaşlığını tasdıqlağan vesiqanı derc etti.
Qırım faali Aleksandr Kolçenko 2014 senesi mayıs 17-de Qırımda «Yedinaya Rossiya» ofisiniñ ateşke berilmesinde şeklenip yaqalanğan edi. O künden berli onı Moskvadaki «Lefortovo» SİZOsında tutalar.
