Qırımtatar halqı qıtaiy Ukrainada qalmağa planlaştırmay ve Qırımnıñ tezden keri qaytarılmasına ümüt ete, – dep ayttı Ukraina prezidentiniñ qırımtatar halqınıñ işlerinden Vekâletlisi Mustafa Cemilev Qırım.Aqiqatqa.
Böyle etip Mustafa Cemilev mühbirniñ Ukrainada Qırımdan köçip kelgen musulmanlar içün yañı camiler qurulacaqmı sualine cevap berdi.
«Bizler qıtaiy qısımda qalmaycaqmız ve azat etüv olacağını tüşünemiz. Lâkin Qırımğa yaqın regionlarda, anda işğalden evel de 12 biñ qırımtatarı oturğan edi, cami ve mekteplerni qurmaq kerek. Anda bir cami bar endi», – dep ayttı Mustafa Cemilev.
Qırımtatar Milliy Meclisiniñ reisi Refat Çubarov bildirdi ki, qırımtatarlar Ukraina Qırımnı yaqın kelecekte keri qaytaracağından eminler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
