Link açıqlığı

Saatnıñ esas haberi

Qırımda ATR operatorını eki ayğa qadar apiske aldılar, imayesi bunı basqı olaraq tanıy


Eskender Nebiyev
Eskender Nebiyev

Aqmescitniñ Kiyev rayon mahkemesinde aprel 22-de toplaşuv olıp keçti, ATR qırımtatar telekanalınıñ operatorı Eskender Nebiyevge eki aylıq apis cezası berildi, taqiqat iyün 20 kününe qadar devam etecek, dep haber ete Qırım.Aqiqat.

Operatornıñ adliyecisi Cemil Temişevniñ aytqanına köre, Nebiyev mahkemede malümat bermedi.

ATR operatorını eki ayğa qadar apiske aldılar
Bekleñiz, lütfen

No media source currently available

0:00 0:01:20 0:00

«Mahkemede Eskender saqlana, taqiqatqa ya da şaatlarğa basqı yapa bilecegini tüşüneler», – dep ayttı adliyeci.

Üç kün içinde adliyeci mahkemeniñ işbu qararına apellâtsion şikâyetni bermek niyetinde.

«Zanımızca, bu qarar lâzim olğan malümatnı almaq içün basqınıñ bir şekli ola», – dedi Temişev.

Eskender Nebiyevni Rusiye Federatsiyası Cinaiy kodeksiniñ 212-nci maddesiniñ 2-nci qısmına köre kütleviy çatışmalarda iştirak etüvde qabaatlaylar. Rusiye qanunlarına köre, onı 3 yıldan 8 yılğa qadar azatlıqtan marum qaldıra bileler.

Aprel 20-de Eskender Nebiyevniñ evinde tintüv keçirildi, onı ise «fevral 26 işi» çerçivesinde yaqaladılar.

Bundan evel mezkür iş boyunca Ali Asanov yaqalanğan edi.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

XS
SM
MD
LG