Link açıqlığı

Kiyevde «Qırımtatar tiliniñ yañı ögretüv usuliyetleri» mevzusında tögerek masanı keçirecek olalar. İşbu tedbir qırımtatar tiliniñ rağbetleştirüvi ve ögretüv usuliyetleriniñ zemaneviyleştirüvinde emiyetli bir adım olacaqtır.

Bunı Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ matbuat hızmeti bildire.

«Tögerek masa neticesinde til bilüv seviyesi farqlı olğan bala ve studentler içün qırımtatar tiliniñ ögretüvi boyunca qullanma ve usuliyet kitapları işlep çıqarılacaq. Qırımtatar tili çeşit millet vekilleri arasında büyük rağbet qazanğanına köre, işbu qullanmalar pek aktual olmalı», – deyler Cemilevniñ ofisinde.

Tögerek masa işine Tasil ve ilim Nazirligi, İçtimaiy siyaset Nazirligi, Ukraina medeniyet Nazirliginiñ temsilcileri, Taras Şevçenko adına KMU türkşınaslıq kafedrasınıñ hadimleri ve A. Krımskiy adına Ukraina Milliy ilimler akademiyasınıñ Şarqşınaslıq İnstitutınıñ mütehassısları, qırımtatar til ve edebiyat ocaları davetlidir.

Tedbir Kiyevde aprel 27 künü saat 14:00 Skovoroda soqağı boyunca yerleşken «Kiyevo-Mogilânskaya Akademiya» Milliy universitetiniñ binasında keçirilecek.

XS
SM
MD
LG