Ukraina prezidentiniñ qırımtatar halqınıñ işlerinden vekâletlisi Mustafa Cemilevniñ ofisinde mayıs 18 künü Qırımda yerli akimiyet Sürgünlik qurbanları hatırasına kütleviy numayışlarnıñ keçirilmesini kene yasaq ete bilecegini tüşüneler. Bunıñ ile Kiyevde facia yıllığına bir sıra tedbirniñ ötkerilmesine azırlıq köreler.
Bunı 5 kanal efirinde Ukraina prezidentiniñ qırımtatar halqınıñ işlerinden vekâletlisiniñ faaliyetini temin etüv bölüginiñ reberi Arsen Jumadilov bildirdi.
«Qırımda sürgünlik qurbanlarını añmağa yasaq ete bileler. Kiyevde, bunı endi ayta billem, Mustaqillik Meydanında büyük bir numayışnı azırlaymız. Yalıñız qırımtatarlarnı degil de, qırımtatar halqınıñ bu deşetli faciasınıñ qurbanlarını añmaq içün bütün Kiyev sakinlerini davet etecekmiz», – dey o.
Qırımda mayıs 18-de Matem Kününiñ lâğu etileceginden Qırımtatar milliy areketi de qorqa.
Soñki yigirmi yıl devamında Qırımda Sürgünlik qurbanları hatıra künü adet üzre mayıs 17-18 künleri qayd etile edi. Bu künleri Aqmescitte 1944 senesi sürgünlik qurbanları abidelerine gülçemberlerni qoya, Qırım Ukraina Muzıkalı Teatrinde hatıra kontserti keçirile, mayıs 17 künü Lenin meydanında – «Yüregiñde ateş yaq» aktsiyası ötkerile edi. Mayıs 18 künü Qırım paytahtınıñ baş meydanında Qırımtatar Milliy Meclisiniñ teşebbüsi ile bütünqırım matem mitingi keçirile edi, mında yarımadanıñ çeşit şeer ve rayonlarından 10-30 biñ insan kele edi.
Bundan istisna keçken sene oldı, Qırımnıñ Rusiye baş naziri Sergey Aksönov öz fermanı ile Aqmescitniñ merkezinde matem mitinginiñ keçirilmesini yasaq etti. Neticede miting Aqmescitniñ civarında – qırımtatarlarnıñ toplu yaşağan Aq-Meçet qasabasında keçti.
