Qırımda ATR qırımtatar telekanalınıñ operatorı Eskender Nebiyevni 2014 senesi fevral 26 künü «kütleviy nizamsızlıqta iştirak etüv»inde qabaatlaylar. Bunı öz Facebook saifesinde ATR telekanalınıñ baş müdir muavini Lilâ Bucurova bildirdi, haber ete Qırım.Aqiqat.
Onıñ sözlerine köre, aprel 20 künü yaqalanğan Nebiyevni alâ daa azat etmediler.
«Tünevin yaqalanğan zenaatdaşımız Eskender Nebiyevniñ bugün azat etilecegine ümüt besley edik. Amma böyle olmadı. Yarın mahkeme toplaşuvınıñ olması mümkün, anda ceza qararı belgilenecektir. Eskenderni kütleviy numayışlarda, yani 2014 senesi fevral 26 künü keçirilgen mitingde iştirak etüvinde qabaatlaylar. Oña advokat yollanıldı», – dey Bucurova.
Qırım.Aqiqat bildirgeni ki, Eskender Nebiyevni aprel 20-de aqşam evinde tintüv keçirilgen soñ yaqaladılar.
Bundan evel mezkür iş boyunca Ali Asanov yaqalanğan edi.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
