Qırımda aprel 21 künü «Reabilitatsiyası yapılğan halqlarnıñ canlanuv künü» olaraq belgilendi, şunıñ içün yarımadada bir sıra tedbirniñ keçirilmesi planlaştırıla.
Bu aqqında Qırımnıñ Rusiye yolbaşçısınıñ Nazirler şurası saytında derc etilgen buyruqta aytıla.
Buyruqta qayd etile ki, bu kün Rusiye Federatsiyasınıñ prezidenti Vladimir Putinniñ 2014 senesi «Ermeni, bulğar, yunan, qırımtatar ve alman halqlarınıñ reabilitatsiyası ve olarnıñ canlanması ve inkişafına kösterilecek devlet yardımınıñ tedbirleri aqqında» buyruğınıñ yıllığı ile bağlı.
Aksönovnıñ emrinde belgilengen tedbirler cedveline binaen, yarımadada qırımtatarlar toplu yaşağan yerlerde kontsert, yarmalıq ve tantanalı merasimler keçirilecek, ticaret teşkil etilecek, mekteplerde ise bunıñnen bağlı mahsus dersler keçirilecek.
Vesiqada «Reabilitatsiyası yapılğan Qırım halqlarınıñ canlanuv kününe» bağışlanğan içtimaiy reklamanıñ azırlanması ve yerleştirilmesi aqqında aytıla.
Qırımnıñ baş nazir muavini Dmitriy Polonskiy aprel 21-ni «quvanç künü» ve qırımtatar halqınıñ sürgünlik kününi – mayıs 18-ni alternativası olaraq saymağa teklif etti.
Tünevin Qırımda qırımtatar uquq qorçalayıcısı Emir-Üsein Kuku ve ATR operatorı Eskender Nebiyevni yaqalap, evlerinde tintüv keçirdiler.
