Aprel 20-de evinde tintüv keçirilgen ATR telekanalınıñ operatorı Eskender Nebiyev «fevral 26 işi» çerçivesinde yaqalandı.
Bunı ATR telekanalınıñ baş müdir muavini Lilâ Bucurova bildire.
«Eskenderni fevral 26-da mitingde iştirak etüvde qabaatlaylar», – dep yazdı Bucurova Facebookta.
Diger jurnalist Osman Paşayev bildire ki, Nebiyev Rusiye Taqiqat komiteti tarafından yaqalandı.
«İşni Bulat Ravilyeviç Azizov alıp bara. Mında ayrı bir tsinizm bar, qırımtatarlarğa qarşı işlerni kazanlar baqa. İş taqiqatçısı – Pavel Nikel. O da yahşı. Küneş batqan soñ, saba erte kibi yaqalamaq – eñ uyğundır», – dep yazdı o Facebookta.
Qırım.Aqiqat bildirgeni ki, Eskender Nebiyevni aprel 20-de aqşam evinde tintüv keçirilgen soñ yaqaladılar. Bundan evel mezkür iş boyunca Ali Asanov yaqalanğan edi. Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
