Rusiyede Moskva bölge arbiy mahkemesi jurnalist ve publitsist Boris Stomahinni yedi yılğa qadar azatlıqtan marum qaldırdı. Onı ekstremizm ve terrorizm çağıruvlarında qabaatlı olaraq tanıdılar, – dep haber ete Radio Svoboda.
Bundan ğayrı, Stomahinge beş yıl devamında jurnalistikanen oğraşmağa yasaq etilecek. Jurnalistniñ adliyecisi dey ki, olar bu qararnı şikâyet etecekler.
Stomahinge qarşı üçünci cinaiy iş boyunca qarar oña çıqarılğan eski qararlarnı da köz ögüne ala. Bu iş jurnalistniñ Kreml siyasetine qarşı maqalelerinen bağlı. O, Şimaliy Qavqazda islâmcılarğa qoltutqan «Kavkaz-tsentr» saytında maqalelerini derc etken edi.
2014 senesi onı milletlerara dava, ekstremizm ve Rusiye topraq bütünligine telüke köstergeni içün altı buçuq yılğa qadar azatlıqtan marum qaldırğan ediler. Bundan evel, 2006 senesi, onı duşmanlıq qozğalaması ve ektremistik çağıruvlar içün beş yılğa qadar mahkeme etken ediler.
Böris Stomahin özüni qabaatlı olaraq tanımayıp, cinaiy işniñ üçü de siyasetnen bağlı olğanını ayta.
