Aprel 22-26 künleri Kiyevde keçirilecek «Kitap Arsenalında» «Qırım elifbesi» taqdim etilecek, dep bildire Sultprostir.
Onı dizaynerler Natalya Gut ve İvan Degtârev azırladılar. Müelliflerniñ Qırımnıñ şeerleri, tabiatı, tarihı, hususiyetlerine dair er bir resmi altında ukrain elifbesiniñ ariflerinen başlağan şiirler bar.
«Kitap 2014 senesi baarde yazılğan edi, memleketimizdeki vaziyetni hatırlaysıñız. Bizler Qırımnı ğayıp etken edik, o vaqıt bu kerçekmi-yoqmı ve böyle ne qadar devam etecek añlaşılmağan edi. Aynı o vaqıt men, bir çoq ukrainli kibi, Qırımnı, onıñ tabiatını ne qadar çoq sevgenimni, menim içün bu ğayıp ne qadar acınıqlı olğanını añlağan edim. Qırım ile bir sıra hoş hatıralarım bağlı, dostlarımnen beraber bir qaç yaznı Qırımnıñ sıcaq yalısında keçirgen edik. Maalesef, yaqın vaqıtta bir çoq kiçik ukrain canlı Qırımnı körip olamaz. Aynı bu sebepten bu kitapnı azırladım – ukrainlerniñ yañı nesili Qırımnı sevsin dep», – dep ayttı kitap müelliflerinden biri Natalya Gut.
Onıñ qayd etkenine köre, kitapta siyaset yoq. Natalya Gutnıñ bildirgenine köre, «Qırım elifbesi» kiçik oquyıcılarğa bilgi bermeknen beraber hoş duyğular da bağışlaycaq, buña renkler ve üslüp yardım etecekler.
«Al-azırda kitapnıñ yalıñız bir qaç nushası bar, olarnı imkânlarıma köre bastırdım. Neşriyatnı qıdırmağa devam etip, ileride kitapnıñ bastırılmasına ümüt etemiz. «Qırım elifbesini» «Kitap Arsenalında» kiçik tükânlar ve neşriyatlar zalında körmek imkânı olacaq», – dedi Gut.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
