«Qırımtatar qarşılıq areketiniñ» koordinatorları eki halqnıñ menfaatlarını qorumaq içün Bütündünya ukrain ve qırımtatar kongressleriniñ birleşmek imkânlarını baqmağa teklif eteler.
«Üküm sürgen vaziyet, em de eki halqımıznıñ – qırımtatar ve ukrain halqınıñ tarihı halqlarımız arasında sıqı munasebetler pekitilmesi kerekligini köstere», – dep tüşüneler qarşılıq areketiniñ temsilcileri, haber ete Qırım.Aqiqat.
Teşkilâtnıñ qayd etkenine köre, umumiy kontakt işçi gruppası meydanğa ketirilse, qırımtatar ve ukrain halqlarınıñ leyhaları azırlanacaq ve bir-biriniñ yardımı ile amelge keçirilecek.
«Qırımtatar qarşılıq areketiniñ» koordinatorları eki halqnıñ Bütündünya kongressiniñ umumiy ukrain-qırımtatar kontakt işçi gruppasında özleri de iştirak etmek isteyler.
Türkiyede iyül 31-den avgust 2-ge qadar Bütündünya qırımtatar kongressiniñ keçirilmesi planlaştırıla. Kongressni toplamaq qararı aprel başında Ankarada Türkiyedeki qırımtatar teşkilâtları platformasınıñ toplaşuvında qabul etildi.
