Link açıqlığı

Qırım uquq qorçalayıcısını «duşmanlıq qozğalamasında» şekleyler, evinden tehnika ve kitaplar alındı


Aprel 20-de saba Yaltada yaqalanğan İnsan aqları Kontakt gruppasınıñ vekili, uquq qorçalayıcı Emir-Üsein Kukunıñ evinde keçirilgen tintüv yekünlendi. Onıñ neticesinde uquq qoruyıcı organlarnıñ hadimleri eki bilgisayar, telefon ve kitaplarnı aldılar, uquq qorçalayıcınıñ özüni ise alıp kettiler.

Bunı İnsan aqları Kontakt gruppasınıñ vekili Abdureşit Cepparov Qırım.Aqiqatqa bildirdi.

«Evde tintüv de olmadı. Emir-Üsein ve ömür arqadaşınıñ bilgisayarlarını aldılar, onıñ telefonını, yasaq etilgen edebiyat cedveline kirmegen yedi kitapnı alıp kettiler», – dedi Cepparov.

Kukunı ne yerge alıp kettiler işdeşi tam bilmey. Yaltadaki uquq qoruyıcı orgalarından birine dep tahmin etile.

Kontakt gruppasınıñ daa bir vekili Mammet Mambetovnıñ Facebookta bergen malümatına köre, Emir-Üsein Kukuğa qarar seslendirildi. Oña binaen, onı Rusiye Federatsiyası Cinaiy kodeksiniñ 282-nci maddesine köre «Duşmanlıq ya da nefret qozğalaması, insan itibarını tüşürüv» kibi cinayette şekleyler.

Cepparovnıñ bildirgenine köre, Kuku saba duraqta, tahmin etilgeni kibi, Qırımdaki Federal havfsızlıq hızmeti (FSB) hadimleri tarafından yaqalandı, amma arbiy urbada adamlarnıñ işaretleri yoq edi.

Uquq qorçalayıcı Gaspra qasaba şurasına işke yol alacaq edi.

İnsan aqları Kontakt gruppasınıñ vekilini Rusiye Federatsiyası 50-nci regionınıñ (Moskva regionı) nomeraları ile beyaz «Gazel» maşinasına oturtıp, taqiqat tedbirlerini keçirmek içün evine yol aldılar.

Qırım.Aqiqat bildirgeni ki, Emir-Üsein Kukunıñ erkek qardaşları yaqalavnı qayd etmege tırıştılar. Faqat arbiy urbada adamlar buña izin bermediler. Erkeklerden birine beden zarar ketirildi.

Qırım uquq qoruyıcılarınıñ bunıñnen bağlı resmiy izaatları olmadı.

XS
SM
MD
LG