Link açıqlığı

Qırımtatarlarnıñ statusı aqqında qanun leyhasını Ukraina parlamentine sürgünlik yıllığına qadar kirsetecek olalar


Qırımtatar Milliy Meclisiniñ reisi Refat Çubarovnıñ yolbaşçılığında işçi gruppa «Qırımtatar halqınıñ statusı aqqında» ve «Ukrainanıñ az sayılı tamır halqları aqqında» eki qanun leyhasını azırladı. Birinci vesiqanı qırımtatarlarnıñ sürgünlik yıllığı mayıs 18-den evel ukrain parlamentiniñ baqılmasına kirsetmege planlaştıralar.

Bunı aprel 20-de Kiyevde olıp keçken matbuat konferentsiyasında Ukraina prezidentiniñ qırımtatar halqınıñ işlerinden Mesüliyetlisiniñ faaliyet teminlevi bölüginiñ müdiri Arsen Jumadilov bildirdi, dep haber ete Qırım.Aqiqatnıñ mühbiri​.

«Qanun leyhasında qırımtatarlarnıñ zaten bar olğan temsil organları Qurultay ve Qırımtatar Milliy Meclisi qanunğa köre tanıla. Bizler bu organlarnı Ukraina devlet akimiyetine, Yuqarı Radadan başlap Qırım Muhtar Cumhuriyetinde yerli şuralarğa qadar kirsetemiz», – dep ayttı Jumadilov.

Onıñ bildirgenine köre, qırımtatarlarnıñ statusı aqqında qanun leyhasında qırımtatarlarnıñ kelecegini belgilemek aqqı pekitile – tasil, medeniyet, sport ve halq yaşayışınıñ diger saalarını belgilemek imkânları qanun derecesinde kefil etilmekte. Jumadilovnıñ qayd etkenine köre, vesiqağa köre Qurultay ve Meclis Ukraina devlet bücetinden maliye etilecek, akimiyet organları ve yerli idare organlarında qırımtatarlar içün yerler ayırılacaq.

XS
SM
MD
LG