Link açıqlığı

Bazar künü, aprel 19-da, Poloniya ukrainlileri Varşavada Rusiye Federatsiyasınıñ elçihanesi yanında Rusiye tarafından 2014 senesi mart ayında işğal etilgen Qırımğa qol tutuv aktsiyasını keçirdiler.

Bunı «Yevromaydan-Varşava» bildire.

Teşkilâtnıñ malümatına köre, ukrain ve qırımtatar timsalleri ile yaraştırılğan büyük avtobusta ukrainliler Varşavanıñ merkeziy soqaqlarını dolaştı. Aktsiyanıñ ilk turağı – Rusiye elçihanesi oldı. Narazıcılar ellerinde ukrain bayraqlarını tutıp «Qırım – Ukraina» dep qıçırmaqta edi.

Miting alıp barıcısı Andrey Golosko aktsiyada tek ukrainliler degil de, Qırım işğaline qarşı çıqqan diger millet vekilleriniñ bulunğanını bildirdi.

«Eñ büyük hatamız – epimiz Qırım imperiyanıñ dağıluvı ile qaytacağını tüşünemiz. Tam tersi. Qırımnı qaytarsalar, demek cinayetleri de azca olur, mahkemede de cezaları qısqartılır. İleride de Qırımnıñ işğalini saqlap tursalar, cezaları müthiş olur. Kemlik imperiyası – birinci degil. Stalin ve Gitlerniñ izdeşleri. Birincisi, ekincisiniñ de soñu bellidir», – dedi aktsiya devamında «Razom» Birdemlik Areketi»niñ yetekçisi Vâçeslav Sivçik.

Elçihane yanından keçken aydavcılar da ukrainlilerge destegini bildirmekte edi.

Faallerniñ fikrine köre, Rusiyeniñ Ukrainadaki istilâsınıñ toqtatılmasını bütün halqara teşkilâtlardan talap etmek kerek. Aktsiyada ukrainlilerni Ukrainada küçlü iqtisadiyatnı qurmaq içün areket etmege çağırdılar.

Aktsiyadan soñ faaller, avtobusqa minip, Ukraina elçihanesine kettiler. Mında olar Qırımda yaşağan ukrain ve qırımtatarlarğa qol tutuv videosını yazğanlar.

Malüm olğan kibi, raatlıq künleri Rusiyeniñ Ukrainadaki istilâsına ve Qırım işğaline qarşı miting Pragada keçti.

Rusiye Qırımnı 2014 senesi mart ayında işğal etti.

XS
SM
MD
LG