Link açıqlığı

«Zima, uhodi!» ve «Deti-404» filmleriniñ müellifdeşlerinden biri kinorejissör Askold Kurov prodüserler Maks Tuula, Mariya Gavrilova ve Olga Jurjenko ile beraber Qırımda bir yıl evelsi FSB hadimleri tarafından teraktlarnıñ teşkil etilmesinde şeklenip yaqalanğan «Oleg Sentsovnı azat etmek» vesiqalı leyhağa başladılar.

Bunı «Otkrıtaya Rossiya» cemaat teşkilâtınıñ saytında bildireler.

Askold Kurov 2014 senesi mayıs ayınıñ vaqialarını canlandırmağa tırışıp, Sentsovnıñ Qırımda yaqalanması ile vesiqalı film-taqiqatını çıqara.

«Oleg Sentsovnı azat etmek» leyhası çerçivesinde bütün dünyadan ukrain rejissörine qoltutqan kinematografistler ile videointervyü keçirilecektir.

Teşkilâtnıñ malümatına köre, Avropa konorejissörları – Kşiştof Zanussi, Agneşka Holland, Rusiye kinorejissörları – Pavel Bardin, Marina Razbejkina, Boris Hlebnikov ile bir qaç intervyü yapıldı. Ağa-qardaş Mihalkovlar, Pavel Lungin ve digerleri ile intervyü keçirilmesi planlaştırıla.

İntervyü yalıñız internette degil, halqara kinofestivallerde de kösterilmekte – misal olaraq, Kiyevde DocuDays UA, Londrada OpenDocs ve Wiesbadendeki goEast festivaliniñ açılışında. Leyha müellifleri bu levhalar ve azır olğan film Oleg Sentsovğa azatlıqqa çıqmağa yardım eteceklerine ümüt eteler.

«Otkrıtaya Rossiya» Kşiştof Zanussiniñ çıqışı ile Oleg Sentsovğa qoltutuv levhasını derc etti.

Oleg Sentsov 2014 senesi mayıs ayında Rusiye FSB hadimleri tarafından Qırımda yaqalanğan edi. Onı Aqmescit, Yalta ve Aqyarda teraktlarnıñ azırlanmasında qabaatlaylar. Sentsovnıñ adliyecisi SİZOda onı çekiştirgenlerini bildirgen edi. Rejissör qabaatını red ete. Bundan ğayrı, bu iş boyunca daa üç kişi yaqalandı.

Aprel 16-da taqiqat ukrain rejissörini «silânı qanunsız tutuvda» da qabaatladı.

Moskvanıñ Lefortovo mahkemesi ukrain rejissöri Oleg Sentsovnıñ apis müddetini mayıs 11-ge qadar arttırdı.

Sentsovnıñ bir çoq işdeşi ve uquq qorçalayıcılar onı siyasiy mabus olaraq tanıp, onı azat etmege çağıralar. Olarnıñ fikirince, Sentsovğa qarşı qabaat sahte ola. Sentsov – Euromaydannıñ faal iştirakçisidir.

XS
SM
MD
LG