Link açıqlığı

Smedlâyev: «fevral 26 işi» boyunca yaqalanğanğa Çiygozğa qarşı malümat berip, azat olmağa teklif etken ediler


Qırımtatar milliy areketiniñ faali, Qurultay Merkeziy saylav komissiyasınıñ reisi Zair Smedlâyev bildire ki, aprel 17-de 2 ayğa qadar apiske alınğan Ali Asanovnıñ sorğusında oña «fevral 26 işi» boyunca yaqalanğan Meclis reisiniñ muavini Ahtem Çiygozğa qarşı malümat bermege teklif etken ediler.

Bunı Qırımtatar Milliy Meclisiniñ matbuat hızmeti bildire.

Matbuat hızmeti qayd ete ki, apiske alınğan Asanovnıñ imayesi mahkeme qararını şikâyet etecek.

Qırım.Aqiqat bildirgeni kibi, Aqmescitniñ Kiyev rayon mahkemesinde aprel 17-de Asanovnı eki ayğa taqiqat bitkenine qadar, yani 2015 senesi iyün 15-ke qadar apiske almaq qararını qabul etti.

Mahkeme qararında İ.A.Postnıy ve V.D.Kornevağa diqqatsızlıq sebebinden ketirilgen ölüm aqqında aytıla. Ali Asanovnı Rusiyeniñ Ceza kodeksiniñ 212-nci maddesiniñ 2-nci qısmı boyunca cinayette (üç yıldan sekiz yılğa qadar apis cezasını belgilegen kütleviy numayış) qabaatlı olaraq mesülietke çekmek qararı alındı.

Asanovnı yaşağan İçki rayonınıñ Ferngeym köyünde (Urojaynoye) aprel 15-te yaqaladılar. Uquq qoruyıcı organlarnıñ hadimleri onı bir gece Bağçasarayda tutıp, aprel 16-da Aqmescitniñ Qırım taqiqat komitetine sorğuğa alıp kettiler.

Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.

Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.

Uquq qorçalayıcılarnıñ malümatına köre, «fevral 26 işi» boyunca 4 qırımtatarı yaqalandı, Asanov beşinci oldı.

XS
SM
MD
LG