Rusiye tarafından işğal etilgen Qırımnıñ Kezlev şeerinde televideniye hızmetlerini köstergen «Elas» şirketi cuma künü, aprel 17-de, ukrain telekanallarını söndürdi. Bunı Qırım.Aqiqatnıñ mühbiri bildire.
Cuma künü beş kanal söndürildi: 2+2, «Perşıy natsionalnıy», «STB», «Ukraina» ve «Yenter-film».
Ekranda «Rusiyede qayd etilmegen telekanallar yayınlav cedvelinden çıqarıldı» yazısı bar.
«Ukraina ile soñki bağlarnı üzeler! İnsafsızlıq, bizim yerimizge saylaylar – ne baqacaqmız, ne baqmaycaqmız», – dep açuvlandı Kezlev sakini Yekaterina, soyadını aytmamağa rica etti.
Al-azırda Kezlevde ukrain telekanallarından «İnter+» kanalı qaldı. Ukrainanıñ diger kanalları bundan evel ğayıp olğan edi.
2015 senesiniñ başında Qırım memurları qırımlılarnı ukrain telekanallarından marum qaldırmaq imkânları barmı-yoqmı dep soramağa başladılar. Bunı yanvar 27-de Qırımnıñ mülümat siyaseti, bağ ve kütleviy alâqalar devlet komitetiniñ toplaşuvında muzakere etken ediler.
