Aqmescitniñ Kiyev rayon mahkemesinde aprel 17-de aprel 15-te «fevral 26 işi» çerçivesinde yaqalanğan Ali Asanovnıñ toplaşuvı olıp keçti. Qırım.Aqiqatnıñ muhhbiri bildire ki, Asanovnı eki ayğa taqiqat bitkenine qadar, yani 2015 senesi iyün 15-ke qadar apiske almaq qararı qabul etildi.
Mahkeme qararında İ.A.Postnıy ve V.D.Kornevağa diqqatsızlıq sebebinden ketirilgen ölüm aqqında aytıla. Ali Asanovnı Rusiyeniñ Ceza kodeksiniñ 212-nci maddesiniñ 2-nci qısmı boyunca cinayette (üç yıldan sekiz yılğa qadar apis cezasını belgilegen kütleviy numayış) qabaatlı olaraq mesülietke çekmek qararı alındı.
Ali Asanovnıñ babası bunıñ adaletsiz olğanını ayta.
«O, qabaatlı degil. Ne içün onı bu qadar qıynaylar bilmeyim. Bizni mahkemeniñ içerisine bile almadılar, anda çoq yer bar edi, biz ayaqta turmağa da azır edik», – dep ayttı yaqalanğannıñ babası Ahmed Asanov.
İnsan aqları Qırım alan missiyasınıñ malümatına köre, Ali Asanovnı bir gece Bağçasarayda tutıp, aprel 16-da Aqmescitke Qırımnıñ Taqiqat komitetine sorğuğa alıp kettiler. Uquq qorçalayıcılarnıñ bildirgenine köre, «fevral 26 işi» boyunca 4 qırımtatarı yaqalandı.
Hatırlatamız, 2014 senesi fevral 26-da Qırım parlamentiniñ binası ögünde Qırımtatar Milliy Meclisi ve «Rus birliginiñ» bir qaç biñ tarafdarı toplaşqan edi. Tedbirni Meclis reisi Refat Çubarov ve «Rus birliginiñ» lideri Sergey Aksönov teşkil ettiler. Çatışmalar neticesinde eki insan elâk oldı. Rusiye Taqiqat komiteti bundan sebep cinaiy işni açtı.
Onıñ taqiqatı çerçivesinde «kütleviy numayışlarnı teşkil etüv ve iştirak etüvde şeklengen» Qırımtatar Milliy Meclisiniñ reis muavini Ahtem Çiygoz yanvar 29-da yaqalandı. Onı 2015 senesi fevral 19-ğa qadar apiske aldılar, soñra da apis müddetini mayıs 19-ğa qadar arttırdılar.
