Aqmescit civarında, qırımtatarlarnıñ toplu yaşağan mikrorayonında, bina ve isarlarda «ATR» ve «Meydan» graffitileri peyda oldı, haber ete Qırım.Aqiqat mühbiri.
Yerli sakinlerniñ aytqanı kibi, bu yazılar ile olar Roskomnadzor musaadesi olmağanından sebep qapalğan qırımtatar telekanal ve radiosına destegini bildireler.
İnsanlar işbu matbuat vastalarınıñ qaytarılacağına ümüt besley.
2015 senesi aprel 1-den itibaren ATR telekanalı işini toqtattı.Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.
Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
