Link açıqlığı

Üyleden soñ Aqmescitte «fevral 26» işi boyunca yaqalanğan faalge ceza belgilenecek


Aqmescit Kiyev rayon mahkemesiniñ toplaşuvında aprel 17 künü üyleden soñ aprel 15-de «fevral 26» işi boyunca yaqalanğan Ali Asanovğa ceza qararı belgilenecek.

Qırım.Aqiqatqa Qırımtatar Milliy Qurultayınıñ Merkeziy saylav komissiyasınıñ başı Zair Smedlâyev bildirgeni kibi, toplaşuv saat 14:00 keçirilecek.

Qırımda aprel 15 künü «fevral 26» işi boyunca yaqalanğan Ali Asanov apiste qaldırıldı. Evel bu iş boyunca 4 qırımtatarı yaqalanğan edi.

2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.

Qırımda uquq qoruyıcılar qırımtatar faallerini ep sorğularğa çeke ve bunı bıltır fevral 26-da olğan işniñ taqiqatı ile añlatalar.

XS
SM
MD
LG