Link açıqlığı

Uquq qoruyıcı Qırımda «fevral 26» işi boyunca sorğularğa celp etilgen faallerge berilgen suallerni aydınlattı


Qırımda «fevral 26» işi boyunca yaqalanğanlarnı sorğu devamında Rusiye uquq qoruyıcıları o vaqialarda iştirak etken diger faallerniñ adlarını aytmağa çağıralar, haber ete Qırımtatarlarnıñ aq-uquqlarını qorçalav komitetiniñ koordinatorı Eskender Bariyev.

Bunı о Qırım.Aqiqatqa bergen azaatında bildirdi.

«İnsanlarnı tuta, sorğularğa çekeler, mitingde fotolarnı kösterip, bazı insanlarnıñ adlarını bildirmege çağıralar», – dedi Bariyev.

Onıñ sözlerine köre, şimdi uquq qoruyıcılar mitingniñ er bir iştirakçisini şaat olaraq saya, amma ileride taqiqat tarafından şantaj ola bilecegini de red etmey.

«İleride, ğaliba, olardan bu insanlar ile diger foto ola bile ve olar işbu fotolarnıñ vastası ile şantaj etecekler. Menimce, şimdi cinaiy işler açlıacaq muayyen insanlar boyunca malümat toplaylar ve ileride bütün bu şahıslarğa problemlerni azırlaycaqlar. Bir zıncır, dep tüşünem», – dedi Bariyev.

Qırımda aprel 15 künü «fevral 26» işi boyunca yaqalanğan Ali Asanov apiste qaldırıldı. Uquq qoruyıcılarnıñ malümatına köre, aprel 17-de, cuma künü, Aqmescitniñ Kiyev rayon mahkemesi ceza qararını belgilecek. Evel bu iş boyunca 4 qırımtatarı yaqalanğan edi.

2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.

Qırımda uquq qoruyıcılar qırımtatar faallerini ep sorğularğa çeke ve bunı bıltır fevral 26-da olğan işniñ taqiqatı ile añlatalar.

XS
SM
MD
LG