Link açıqlığı

Memurlarnıñ hatasından sebep Sudaq ocaları tibbiy teşkerüvden öz esabına keçeler


Sudaqta ocalarnı mecburiy tibbiy komissiyanı öz esabına keçmege zorlaylar, – dedi Qırım Devlet şurasınıñ tasil, ilim, yaşlar siyaseti ve sport boyunca komitetiniñ toplaşuvında reisi Vladimir Bobkov. Onıñ sözlerine köre, tibbiy komissiya fiyatı – 3 biñ ruble etrafında, dep yaza Krıminform.

Cumhuriyet tasil naziriniñ muavini Oksana Krasnikova şunı bildirdi ki, tibbiy komissiya yalıñız ocalar içün degil de, studentler içün de mecburiy ola eken.

«Sağlıq saqlav nazirligine muracaatta bulundıq, amma ne menfiy, ne müsbet cevapnı alalmadıq», – dey o.

Toplaşuvda malüm olğanına köre, ocalarnıñ tibbiy komissiyadan keçmesine para belediye teşkilâtlarınıñ bücetlerinden ayırılmalı, Sudaqta bunı yapmadılar.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG