2016 senesi sentâbr 1-den Qırım mekteplerinde ukrain ve qırımtatar tilleriniñ mecburiy oqutuvı ola bile. Bunı Qırım Devlet şurasınıñ milletlerara munasebet boyunca komitet toplaşuvında Delvet şurası reisiniñ muavini Remzi İlyasov bildirdi, – haber ete «Krım Media».
Onıñ fikrine köre, Qırım mekteplerinde yalıñız rus tili degil de, Qırımnıñ üç devlet tili ögretilmeli. Bunıñ ile qırımtatar ve ukrain tilleriniñ oqutuvından «umumrusiye devlet tili olğan rus tiline ziyan olmamalı».
Neşirniñ bildirgenine binayen, İlyasov işbu teşebbüsniñ amеlge keçirilmesi içün mahsus programma, derslikler azırlanmalı ve ocalar ögretilmeli.
«Bunıñ ile bu tillerniñ oqutuv programması talebelerniñ azırlıq seviyesine uyğun olmalı, olardan bazılar tilni iç bilmey de», – dedi spiker muavini.
Qırım Delvlet komitetiniñ reis muavini Remzi İlyasov Devlet şurasına «Qırım Cumhuriyetinde devlet ve diger tillerniñ qullanılması aqta» qanun leyhasını kirsetti. Vesiqağa köre, qırımtatar ve ukrain tilleri, rus tili ile bir sırada, yarımadanıñ oquv yurtlarında mecburen ögrenilmeli.
