Link açıqlığı

Saatnıñ esas haberi

Aqyarda Putin ile telekopür: insanlarnı tinteyler, sual qoymağa imkân bermeyler


Aqyarda cumaaqşamı, aprel 16-da, Nahimov meydanında Rusiye prezidenti Vladimir Putinge sual bermege istegen 150 insan toplandı, faqat aqyarlılar içün telekopür öyle de teşkil etilmedi, adiy yayınlav keçirile, – dey Qırım.Aqiqat mühbiri.

«Akimiyetimiz ailemizge qanuniy ceetten ait olğan evimizni tutıp almaqta. Yerli uquq qoruyıcılar nice arizalarımızğa qulaq asmaylar», – dep bildire Aqyarnıñ sakinlerinden biri.

Qadınnıñ aytqanına köre, Rusiye prezidentine sual bermek imkânı onıñ içün «soñki ümüt» edi. Qadın prezidentke «yerli akimiyetniñ qanunsızlığını toqtatmaq» ricası ile buyaracaq edi.

«Telekopürniñ olmağanından közüm qayttı. Meydanda deputatlarımız buluna, amma vade etilgen telekopürniñ teşkil etilmegeniñ sebebi aqta sualime cevap bermediler», – şikâyet ete Aqyar sakini.

Qırım.Aqiqat mühbiri aytqanı kibi, meydanğa kelgen insanlar ellerinde çeşit mündericeli levhalarnı tuta.

Nahimov meydanında politsiya, FSB, yerli «samooborona» ve kazaklarnıñ vekilleri buluna. Politsiya ve FSB bir qaç kere vatandaşlarnı toqtatıp, vesiqalarını soray edi.

Qırım.Aqiqatqa tintüvge oğrağan insanlardan biri bildirgeni kibi, «onı baza boyunca teşkerip, yolladılar».

«Vesiqalarımnı teşkerdi, bir qaç sual berip, yolladılar. Öz areketlerini FSB tariklerniñ ögüni almaq ıntıluvı ile añlattı», – haber ete Aqyar sakini Sergey.

Şunı qayd etmek kerek ki, yayınlav vaqtında daimiy sürette ses yoq ola, insanlar tehnikiy problemlerge açuvlana ve yayınlavnıñ deral yañartılmasını talap eteler.

XS
SM
MD
LG