Hayser Cemilevniñ işinde zarar körgen taraf, merhum Fevzi Edemovnıñ apayı, qabaatlanğan onıñ qocasını muqaytsızlıqtan, istemeyip öldürilgenini tüşüne.
Bunı o aprel 16 künü Krasnodar diyarınıñ mahkemesinde bildirdi, haber ete advokat Nikolay Polozov.
«Zarar körgen Edemova toplaşuvda aqayınıñ öldürilmesi istenilmeyip yapılğanını tüşüngeni aqta bildirdi», – yazdı o twitterde.
Advokatnıñ aytqanı kibi, qabaatlayıcı taraf yigirmi şaattan yalıñız ekisini sorağan eken.
Hayser Cemilevniñ işi boyunca nevbetteki toplaşuv aprel 23 künü keçecek.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
