Link açıqlığı

Qırımda aprel 15-de, gece, yaqalanğan Ali Asanovnı uquq qoruyıcılar eki insannıñ ölüminde qabaatlaycaq olalar, dedi Qırım.Aqiqatqa qırımtatarlarnıñ aq-uquqlarını qorçalav komitetiniñ reisi, Meclis azası Eskender Bariyev.

«Onı «fevral 26» işi boyunca yaqaladılar, amma bütün gece Bağçasarayda tutqan ekenler, anda ne ola, belgisiz, amma onı eki insannıñ ölüminde qabaatlaycaq olğanları aqta malümat bar», – dey Bariyev.

«Vaziyet pek qıyın ve pıtraqlıdır, malümat ğayet az. Belki de, söz 2014 senei fevral 26 künü eki elâk olğan insan aqta kete. Şimdilik belgisizdir», – dedi uquq qoruyıcı ve Aqmescitte ferval 26 künü olğan miting vaqtında eki insannıñ – erkeknen qadınnıñ ölgenini hatırlattı.

İnsan aqları boyunca Qırım alan eyyeti bildirgeni kibi, aprel 15 künü yaqalanğan Ali Asanovnı bütün gece Bağçasarayda tutıp, aprel 16-da Aqmescitte Qırım Taqiqat komitetine alıp keteler.

2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.

XS
SM
MD
LG