Link açıqlığı

Uquq qoruyıcılar: yaqalanğan qırımtatarnı bütün gece Bağçasarayda tutıp, şimdi sorğuğa alıp keteler


Aprel 15 künü yaqalanğan Ali Asanovnı bütün gece Bağçasarayda tutıp, şimdi Aqmescitte Qırım Taqiqat komitetine alıp keteler.

Bunı İnsan aqları boyunca Qırım alan eyyeti bildire.

«Tünevin qırımtatarı Ali Asanovnı Taqiqat komitetine degil de, Bağçasarayğa ketirdiler, şimdi ise Aqmescitte keçirilecek sorğuğa alıp keteler. Tuvğanlarınıñ sözlerine köre, onı «fevral 26» işi çerçivesinde yaqaladılar», – deyler uquq qoruyıcılar

Qırımda aprel 15 künü, aqşam, İçki rayonı Ferngeym (Urojaynoye) köyünde Asanov Ali Ahmedoviçni saat 9-ğa yaqın 2014 senesi fevral 26-da olğan miting sebebinden sorğuğa alıp kettiler.

2014 senesi fevral 26 künü Qırım parlamenti yanında Qırımnıñ Ukrainadan ayırıluvına qarşı çıqqan ve qol tutqanlarnıñ kütleviy mitingi keçti. Qırımtatarlarğa, Meclis temsilcileri ve Ukraina tarafdarlarına Rusiye tarafını tutqan vatandaşlar qarşılıq kösterdiler. Soñkilerni Qırımnıñ şimdiki başı Sergey Aksönovnıñ reberliginde «Russkoye yedinstvo» yetekçileri topladılar.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler. Qırım Yuqarı Mahkemesi fevral 6 künü SİZOda bulunğan Qırımtatar Milliy Meclis reisiniñ muavini Ahtem Çiygoznıñ şikâyet arizasını red etti. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.

XS
SM
MD
LG