Cumaaqşamı künü, aprel 16-da, Aqyardaki Nahimov meydanında «Vladimir Putin ile doğru bağnı» kösterecekler, şeer sakinleri davet etile.
Bunı Aqyarnıñ Rusiye ükümetiniñ matbuat hızmeti bildire.
İlânğa binaen, Aqyarlılar cep telefon, ev telefonı, em de şeerniñ yedi taksofonı vastası ile telefon ete bileler. Taksofonlardan biri Nahimov meydanındaki ekrannıñ yanında, Şeref tahtası ve Moskva Eviniñ yanında, yerleşe.
Vladimir Putin cumaaqşamı künü rusiyeliler ile «Doğru bağ» ananeviy subetini keçirecek. Muracaat etken rusiyelilerniñ çoqusı içtimaiy-iqtisadiy, mesken-kommunal hocalığı saalarınen bağlı meseleler, halqara vaziyet, em de Ukraina vaziyetinen meraqlana. Prezidentniñ matbuat kâtibi Dmitriy Peskovnıñ aytqanına köre, bir çoq muracaat italât deñişmesi ile bağlı.
Çarşenbe künü, aprel 15-ke qadar, rusiyelilerden 1,7 million sual ve muracaat keldi.
