Qırımtatarlarnıñ milliy lideri Mustafa Cemilevniñ oğlu Hayser Cemilevniñ işi boyunca Krasnodar rayon mahkemesinde Qırım şaatlarını sorğuğa çekmek içün videobağnı quracaqlar.
Bunı adliyeci Nikolay Polozov bildire.
«Cemilevniñ işi boyunca şaatlarnı Krasnodar rayon mahkemesinde videobağ vastasınen sorğuğa çekecekler, Rusiye Federatsiyasınıñ Cinaiy protsessual kodeksiniñ 278.1 maddesine köre», – dep yazdı o aprel 15-te Twitterde.
Toplaşuv aprel 16-da saat 11:00 başlanmalı.
Keçken toplaşuvda, aprel 14-te, Krasnodarda Qırım prokurorları bulundılar.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
