Link açıqlığı

Cemilev: rusiyeliler UNESCO memleketleriniñ temsilcilerine qırımlılarnıñ «bahtlı» ömürleri aqqında tarif eteler


Mustafa Cemilev

Qırım meselesi baqılacaq UNESCO icra şurasınıñ toplaşuvında iştirak etken qırımtatarlarnıñ milliy lideri Mustafa Cemilev bildire ki, tedbir başlamazdan evel rusiyeliler UNESCO memleketleriniñ temsilcilerine yarımadada «yahşı ömür» aqqında ikâye etmege tırıştılar.

Bunı Cemilevniñ matbuat hızmeti bildire.

Qırımtatarlarnıñ lideri bergen malümatına köre, UNESCO memleketleriniñ temsilcilerine «işğal etilgen yerde yahşı ve quvançlı yaşayış» aqqında sekiz saifelik risalelerni tarqattılar.

«Başından soñuna qadar risale – yalan. Olardan er birini ayrı-ayrı izaatlamaq içün çoq vaqıt kerek», – dedi Cemilev. Onıñ qayd etkenine köre, Rusiye eyyetiniñ UNESCO memleketlerine munasebeti olarnıñ başqalarğa olğan sayğısızlıqnı köstere».

Ukraina prezidentiniñ qırımtatar halqınıñ işlerinden vekâletlisiniñ matbuat hızmeti bildire ki, aprel 16-da Cemilev UNESCO İcra şurasınıñ toplaşuvında çıqışta bulunıp, Qırım vaziyetini añlatacaq.

«İşğal etilgen Qırımnıñ problemleri aqqında tafsilâtlıca tarif etmek içün ayırılğan eki daqqa pek azdır. Lâkin, esas maqsad ukrain tarafı teklif etken rezolütsiyanıñ qabul etilmesi ola. Ortaqlarımıznıñ yardımına ümüt etip, rezolütsiya qabul etilecek, dep ümüt besleymiz», – dep qayd etti Cemilev.

Onıñ qayd etkenine köre, o, Avropa memleketleri tarafından vaqtınca işğal etilgen yarımadada monitoring ve tedqiq keçirilmesiniñ müimligini bildirecek. Böyle etip halqara toplulıq Qırımnıñ kerçek vaziyetini ögrenecek.

Malüm olğanı kibi, Ukraina prezidentiniñ qırımtatar halqınıñ işlerinden vekâletlisi Mustafa Cemilev Frenkistanda iş ziyareti ile buluna. Aprel 15-17 künleri Parijde Ukraina ve işğal etilgen Qırım meselesinen bağlı bir sıra tedbirniñ keçirilmesi planlaştırıla.

XS
SM
MD
LG