Halqara toplulıqnıñ Rusiyege qarşı cezaları Minsk añlaşmalarınıñ yerine ketirilmesine bağlı: şimdilik ateş bütünley toqtatılmadı, sıñırlama tedbirleriniñ lâğu etilmesi aqqında laf bile olmaz. Bunı Almaniyanıñ Lübeck şeerinde körüşken «Yedi memleket» iştirakçileriniñ tış işler nazirleri bildirdiler, – dep haber ete Radio Svoboda.
«Cezalarnıñ devam etmesi Rusiye tarafından Minsk añlaşmalarınıñ yerine ketirilmesi ve Rusiyeniñ Ukraina mustaqilligine sayğısına bağlı», – dep qayd ettiler nazirler.
«Yedi büyük memleket» Ukraina şarqındaki zıddiyet iştirakçilerini Minsk añlaşmalarına riayet etmege çağırıp, Rusiyeni separatistlerge tesir etmege çağırdı.
«Yediniñ gruppası» nazirleriniñ körüşüvi Avropa diplomatiyasınıñ yolbaşçısı Federica Mogherininiñ iştiraki ile Lübeckte eki kün devam etecektir.
