Link açıqlığı

Goskomteleradio Kiyevde «Qırım malümat maarif merkezini» ğayrıdan tikledi


Ukrainada «Qırım malümat maarif merkeziniñ» işini canlandırdılar. Qırım işğalinden evel Aqmescitte yerleşken «Bütünukrain malümat maarif merkezi» faaliyetiniñ ğayrıdan tiklenmesi aqqında buyruqnı Devlet televideniye ve radio komitetiniñ (Goskomteleradio) reisi Oleg Nalivayko imzaladı.

Komitetniñ matbuat hızmeti bildirdi ki, buyruqlardan biri merkezniñ Kiyevge köçmesini tasdıqlay. Teşkilât Bogdan Hmelnitskiy soqağında yerleşken Goskomteleradioğa boysunğan Ukrteleradiopressintitutında yerleşecektir.

Merkezniñ yañı nizamnamesi tasdıqlandı ve merkezniñ adı «Qırım malümat maarif merkezi» oldı.

«Ğayrıdan tiklengen merkezniñ esas vazifesi Ukraina vatandaşları, şu cümleden vaqtınca işğal etilgen topraqlarda yaşağan tamır halqlar ve milliy azlıqlarnıñ temsilcileri ile malümat ve medeniyet bağlarınıñ qurulması ve teminlevidir», – dep ayttı Goskomteleradio reisiniñ birinci muavini Bogdan Çervak.

Onıñ bildirgenine köre, merkez işğal etilgen yerlerden Ukrainanıñ diger regionlarına köçip kelgen adamlarnıñ aq-uquqları ve serbestliginiñ temin etilmesine yardım etecektir.

«Qırım malümat maarif merkezi» halqara, devlet ve cemaat teşkilâtları ile işbirlik tutıp, Ukrainanıñ işğal etilgen topraqlarnıñ azat etilmesine yardım etecektir.

Merkez faaliyetiniñ yönelişleri arasında – ukraince, qırımtatarca ve diger tillerde neşirlerni azırlaycaq malümat ve neşriyat bazasını tiklev; Ukrainanıñ vaqtınca işğal etilgen yerlerinde Ukraina vatandaşlarınıñ aq-uquqlarınıñ bozulmasını qayd etüv.

Goskomteleradio qayd ete ki, işğal etilgen Qırımdan köçip kelgen cemaat erbapları merkezniñ faaliyetini ğayrıdan tiklemege yardım eteler. Cemaat erbabı, «Euromaydan – Krım» areketiniñ koordinatorı olğan Andrey Şçekun devlet teşkilâtını yañı yerde ğayrıdan qayd ete.

«Bütünukrain malümat maarif merkezi» 1996 senesi Aqmescitte Goskomteleradioğa boysunğan ve kâr qazandırmağan teşkilât olaraq meydanğa ketirilgen edi. Qayd etile ki, bu merkez Qırımda siyrek rastkelgen ukrain tili ve medeniyetiniñ yeri edi.

XS
SM
MD
LG