İşğal etilgen yarımadada musulman ve islâm müessiseleriniñ tintüvlerine «Ukrainanı birinci olıp satqan bazı musulmanlar» qoltuta, – dep ayttı Ukraina musulmanları Diniy idaresiniñ müftisi Said İsmailov.
Bunı o, aprel 15-te «Qırımnıñ din cemiyetleri: aq-uquqlarınıñ bozulması ve siyasiy sebeplerden taqip» adlı brifingde bildirdi, dep haber ete Qırım.Aqiqat.
İsmailovnıñ aytqanına köre, bunıñ kibi adamlarnıñ çoqusı habaşılarnıñ areketlerine ait.
«Tavriya müftiyatınıñ açılmasını ilân etip, işğal devamında din ve millet erbapları, oquv yurtlarını Rusiyege qarşı çıqqanlarında, Ukrainağa qoltutqanlarında qabaatlaylar. İç bir sebepsiz ekstremizmde bile qabaatlaylar. Ve bunıñ kibi qabaatlardan soñ tintüvler keçirile», – dedi müfti.
Böyle etip, onıñ aytqanına köre, Qırımnıñ işğalci akimiyeti Rusiyege qoltutqan din erbaplarını qullanıp, dindaşlarını qabaatlamalarını isteyler, soñra ise tintüv keçirile ve dindarlarğa basqı yapıla.
Rusiye uquq qoruyıcılar qırımlılarnıñ evlerinde tintüv keçirmege devam eteler. Bu afta Qarasuvbazar regional meclisiniñ reisi, em de ağa-qardaş Velilâyevlerniñ qorantasında Qarasuvbazarda tintüv keçirildi.
Qurultay Merkeziy saylav komissiyasınıñ reisi Zair Smedlâyev Qırım.Aqiqatqa tahminlerini aydınlatıp, qırımtatar faallerini olarnıñ eski ortaqları çaqa bile, dep ayttı.
Keçken sene Qırımda Tavriya müftiyatı adlı yañı diniy teşkilât peyda oldı. Onıñ reisi habaş areketiniñ Qırım musulmanları diniy merkeziniñ vekili oldı.
