Link açıqlığı

Qırımtatar Milliy Qurultayı Teftiş komissiyasınıñ reisi, Meclis azası Ali Özenbaş mahkemege Aqmescit prokuraturasınıñ areketlerinden şikâyet etti. Onıñ fikirince, prokuraturanıñ yapqanları Rusiye qanunlarını bozmaqta.

«Qırım Cumhuriyeti Aqmescit prokuraturasınıñ maña mart 30-da berilgen «ekstremistik faaliyet ile küreş qanunları ve numayış, miting, toplauv, yürüş ve piket qanunları aqqında qanunlarnıñ bozulması aqqında» tenbileri meni aqaretley, çünki hırsızlıq, narkotik satılması, zorbalıq ve diger cinayetler aqqında tenbilerge teñ kele. Bunıñ kibi şübeler bile aqarettir, bunı adaletniñ esas qanunı olğan anayasa metnleri de tasdıqlay. Tabiiy ki, bu vaziyette mahkemeden muracaat etmekten ğayrı şeref ve itibarımnı qorumaq içün başqa çare körmeyim», – dep ayttı Özenbaş Qırım.Aqiqatqa.

2015 senesi aprel 14-te mahkemege berilgen muracaatta aytıla ki, tenbiyelemek içün prokurornıñ «cinayet aqqında malümatı ya da delilleri olmalı».

«Keçirilgen bir sıra tintüvge köre añlaşıla ki, halqımnıñ temsilcileri tarafından yapılğan ekstremistik areketler aqqında malümat yoq», – dep ayttı Meclis azası.

Prokuraturanıñ tenbisi aqqında Özenbaş aprelniñ başında bildirgen edi. O, vesiqada aytılğanlarnı aydınlatıp, «Aqmescit prokuraturasınıñ Qırımtatar Milliy Meclisiniñ azaları tarafından ekstremistik aktsiyalar keçirilecek...» kibi malümatı bar olğanını ayttı.

XS
SM
MD
LG