Link açıqlığı

Cemilev Savçenkonıñ tatası ile Frenkistanda: Rusiye halqara yaramazlıq siyasetini toqtatmalı


Qırımtatarlarnıñ milliy yetekçisi Mustafa Cemilev Vera Savçenko ile – Moskvada makeme etilgen ukrain uçucı Nadejda Savçenkonıñ tatası ile Frenkistanda matbuat vastalarınıñ temsilcileri ile qonuşıp, Rusiye siyaseti, Qırımnı azat etüv yolları ve ukrain siyasiy mabüsleri aqta tarif ettiler.

Mustafa Cemilevniñ matbuat hızmeti bildirgeni kibi, qırımtatarlarnıñ milliy yetekçisi yarımadanıñ şimdiki vaziyeti ve onıñ işğalden azat etilmesiniñ yolları aqta tarif etti.

O şunı qayd etti ki, Qırım iqtisadiy ve siyasiy basqı vastası ile azat etilmek kerek, şunıñ içün Ğarp memleketleri Rusiyege nisbeten cezalarnı arttırmaq kerek.

«Rusiye öz halqara yaramazlıq siyasetini toqtatmaq ve özüni yahşı alıp barmaq kerek»,– dey Cemilev.

Vera Savçenko şunı qayd etti ki, tatasınıñ azat etilmesi işinde siyasetçilerge degil de, insanlarnıñ cemaat destegine ve jurnalistlerniñ saf işine inana eken.

Ukraina prezidentiniñ qırımtatarlarnıñ işlerinden vekâletlisi Mustafa Cemilev iş ziyareti ile Frenkistanda buluna. Matbuat hızmeti bildirgeni kibi, aprel 15-17 künleri Pariste Ukraina ve vaqtınca işğal etilgen Qırım meselelerine bağışlanğan bir sıra tedbirniñ keçirilmesi beklenile.

XS
SM
MD
LG