Link açıqlığı

Ukraina prezidentiniñ qırımtatarlarnıñ işlerinden vekâletlisi Mustafa Cemilev iş ziyareti ile Frenkistanda buluna.

Matbuat hızmeti bildirgeni kibi, aprel 15-17 künleri Pariste Ukraina ve vaqtınca işğal etilgen Qırım meselelerine bağışlanğan bir sıra tedbirniñ keçirilmesi beklenile.

«İş künü (Cemilevniñ – muar.) Frenkistanda Ukrainanıñ Fevqulâde ve Vekâletli Elsiçi Оleg Şamşur ve UNESKOda Ukrainanıñ daimiy temsilcisiniñ muavini Viktor Voytoviç ile körüşüvinden başlandı», – deyler matbuat hızmetinde.

Esas tedbir aprel 15 künü keçirilecek. Şu cümleden, UNESKO icraiy keñeşininiñ 196-ncı sessiyasında Ukraina vaziyeti muzakere etilecek: medeniy mirasnıñ qoruvı, tasil, til siyaseti, matbuat serbestligi, jurnalistlerniñ havfsızlığı ile bağlı meseleler ve ilâhre.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG