Rusiyeniñ Qırım işğali sayesinde Qara deñizde arbiy bulunuvınıñ arttırılması region memleketleri içün havlfdır, Avropa birligi buña seslenmek kerek, dedi salı künü Brükselde, Avropa diplomatları ile körüşüvde, Ukrainanıñ Avropa birligindeki temsilcisi, elçi Konstantin Yeliseyev, dep haber ete Unian.
Diplomat şunı da qayd etti ki, yarımdada Rusiye arbiy bulunuvınıñ artması yüz bere, yani Qara deñiz flotunıñ ve infrastrukturanıñ zemaneviyleşüvi keçirile.
«Qırımnı işğal etip, Rusiye arbiy küçüni ileride de qullanmağa imkân qazandı. Region devletleri içün aqiqiy bir telükedir, şu cümleden Türkiye ve Romaniya devletlerine. AB ve aza-memleketleri bu çağıruvğa cevabını tüşünmek kerektir», – dedi Yeliseyev.
O şunı da qayd ete ki, Rusiye Donbass separatistlerine qanunsız sürette 500 tank, 500 artilleriya tertibatı ve 300 raketa tertibatını yollağandır. Şarqta Ukraina sıñırı ve Qırım tarafında arbiylerniñ sayısı bayağı arttırdı.
Ukraina akimiyeti ve Ğarp memleketleri Rusiyeni Ukraina şarqında separatistlerge qol tutqanında qabaatlay, Moskva işbu qabaatnı red ete.
