Link açıqlığı

Saatnıñ esas haberi

Kence Cemilevniñ işi boyunca zarar körgen taraf 7 million ruble miqdarında ruhiy ve maliyeviy ziyan tazminatını talap ete


Ukraina Yuqarı Şurasınıñ deputatı, qırımtatarlarnıñ milliy yetekçisi Mustafa Cemilevniñ oğlu, öldürüvde qabaatlanğan Hayserniñ işi boyunca zarar körgen taraf 7 million ruble miqdarında ruhiy ve maliyeviy ziyan tazminatını talap ete.

Bunı jurnalistlerge advokat Nikolay Polozov bildirdi, haber ete RAPSİ Rusiye neşiri.

«Öldürilgen şahısnıñ ağası Asan Edemovdan 7 million ruble miqdarında vatandaş davası meydanğa çıqtı, digerlerge endi er şey ödenildi», – dey Polozov.

O şunı da qayd etti ki, aynı şu insan kence Cemilevge Ukrainada keçecek mahkeme ketişatı çerçivesinde 2,5 million grivna miqdarında ziyan tazminatı boyunca vatandaş davasını açtı. Adliyeciniñ aytqanına köre, ukrain taqiqatçıları da Cemilevniñ işini taqiq etip, onı endi mahkemege teslim ettiler.

Nikolay Polozov 2013 senesi mayıs ayında olğan adiselerni «facialı tesadüf» olaraq adladı, Rusiye Taqiqat komiteti ise cinaiy işni yañlış alıp bara, çünki, aytqanı kibi, kence Cemilev öldürüvni huligan niyeti ile yapamaz edi.

Mahkemeciniñ Hayser Cemilev qabaatını tanıymı degen sualine Cemilev «advokatnıñ sözlerini tasdiqlağanını» bildirdi. Zarar körgen kibi (silâ hırsızlavı boyunca) soralğan Safinar Cemileva olarnıñ evinde yüz bergen adise er kesni şaşırtqanını bildirdi, çünki öldürilgen Feyzer Edemov aile azası kibi edi ve Cemilev ile onıñ iç bir problemi yoq edi.

«Ateş açqanını red etmeymiz, bunı aselet yapqanı ile razı degilmiz», – dedi qadın ve olar alâ daa öldürilgen şahısıñ ailesine yardım etkenlerini bildirdi.

Hayser Cemilevniñ işi boyunca nevbetteki toplaşuv aprel 16 künü saat 11:00 keçirilecek.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.

Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.

Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.

XS
SM
MD
LG