Link açıqlığı

Saatnıñ esas haberi

Qırımda ağa-qardaş Velilâyevlerniñ evlerinde tintüv keçirildi


2014 senesi fevral 26 vaqiaları boyunca cinaiy işlerniñ taqiqatı çerçivesinde uquq qoruyıcı organlarnıñ hadimleri salı künü, aprel 14-de, ağa-qardaş Velilâyevlerniñ evlerinde tintüv keçirdiler. Bunı Qırım.Aqiqatqa Qurultay Merkeziy saylav komitetiniñ başı Zair Smedlâyev bildirdi.

Taqiqat areketleri belli qırımtatar iş adamı ve metsenat, Qırım Yuqarı Şurasınıñ sabıq deputatı Resul Velilâyev ve ağası Qarasuvbazar şeer şurasınıñ sabıq deputatı Remzi Velilâyevniñ evlerinde keçirildi.

«Tintüvden soñ Remzi Velilâyevni Taqiqat komitetine alıp kettiler. Birazdan sorğudan çıqtı», – dey Smedlâyev

Onıñ malümatına köre, Remzi Velilâyev «fevral 26» işi boyunca şaat olaraq keçe.

Haber etilgeni kibi, Qarasuvbazar regional meclisiniñ reisi Mustafa Asabanıñ evinde aprel 14-te saba uquq qoruyıcılar tintüv keçirdiler. Qırımtatar milliy areketiniñ faali, Qurultay Merkeziy saylav komissiyasınıñ reisi Zair Smedlâyevniñ bildirgenine köre, uquq qoruyıcılar «fevral 26 işi» boyunca malümatnı qıdıra ediler.

Qırımtatar halqınıñ aq-uquqlarını qorçalav komitetiniñ reisi, Meclis azası Eskender Bariyev bildire ki, Rusiye uquq qoruyıcıları aprel 14-te Qarasuvbazar regional meclisiniñ reisi Mustafa Asabanıñ evinde tintüv keçirip, patronlarnı taptılar. Olarnı, Bariyevniñ aytqanına köre, özleri qoydılar.

Mustafa Asabanıñ evinde tintüv ekinci sefer keçirilmekte. Uquq qoruyıcılar 2014 senesi sentâbr 16-da da tintüv keçirgen ediler. O vaqıt, tintüv neticelerine köre, Asabanıñ qırımtatar milliy areketinen bağlı diniy risaleler alındı. Tintüvden soñ er kişini politsiyağa subet içün davet ettiler.

2014 senesi fevral 26 künü Qırım parlamenti yanında Qırımtatar Milliy Meclis ve «Rusiye birligi» tarafdarları ile kütleviy miting keçti. Qırım Taqiqat komitetiniñ malümatına köre, fevral 26 künü vaqiaları çerçivesinde şaat olaraq 150 insan sorğudan keçti, zarar körgen 40 insan belgilendi ve 2 şahıs mesülietke çekildi.

XS
SM
MD
LG