Rusiye akimiyeti qırımtatar halqınıñ lideri Mustafa Cemilevni oğlu yardımınen taqip ete, – haber ete aprel 14 künü Hayser Cemilevniñ advokatı Nikolay Polozov öz twitterinde Hayser Cemilevniñ, qırımtatarlarnıñ milliy yetekçisi Mustafa Cemilev oğlunıñ işi boyunca mahkeme toplaşuvını izaatlap, dep bildire Qırım.Aqiqat.
«Evelleri sovet akimiyeti Mustafa Cemilevni onıñ ğayeleri içün taqip etkeni kibi, Rusiye akimiyeti de şimdi aynı şeyni yapa. Oğlu yardımı ile», – dep yazdı Polozov.
Advokatnıñ sözlerine köre, mahkeme Hayserniñ babası – Mustafa Cemilevniñ rolü ve faaliyeti ile bağlı sualleri sebebinden onı tenbiyeledi. Mustafa Cemilevniñ özü, iş boyunca şaat olğanına baqmadan, mahkeme toplaşuvına kelip olamay – Rusiyege kirişi yasaq etilgendir.
Nikolay Polozov qayd etkeni kibi, mahkeme toplaşuvına Qırım prokurorları kelgen eken.
«Qırımdan prokuror eyyeti de kelip çıqtı. Eki adliye polkovnigi keldi. Qabaatlayıcı taraf öz küçüne işanmay, ğaliba, qorqa. Mahkeme Ukraina İçki işler nazirliginiñ sabıq, şimdi ise Rusiye İçki işler nazirliginiñ hadimi ile qonuştı. O, o vaqıt silâğa izin berilmesi ile oğraşa edi», – dedi o.
Hayser Cemilevniñ işi boyunca nevbetteki toplaşuv aprel 16 künü saat 11:00 keçirilecek.
Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi.
Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı. Aqmescitniñ Kiyev rayon mahkemesi Hayser Cemilevni apiske aldı.
Qırım işğalinden soñ taqiqat organları bu işni ğayrıdan taqiq etmege qarar berdiler. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey. Hayserni Qırım SİZOsından Krasnodar ülkesine alıp kettiler.
