Ukraina prezidentiniñ qırımtatarlarnıñ işlerinden vekâletlisi Mustafa Cemilev Ukrainada Saudiy Arabistan elçisi Cüdiya Alhazal ile körüşti. Aprel 14 künü Qırımtatar Milliy Meclis reisi Refat Çubarov bildirgeni kibi, körüşüv Kiyevde aprel 8 künü keçti.
Onıñ aytqanı kibi, körüşüvde taraflar işğal etilgen Qırımda qırımtatar halqınıñ vaziyeti ile bağlı meselelerni muzakere ettiler. Ayrı diqqat Qırım musulmanları içün 2015 senesi Hacnıñ ziyaretine ayırılğan edi.
Muzakere neticesinde taraflar Saudiy Arabistan Qırımda yaşağan musulmanlarnıñ menfaatı ile bağlı meselelerni Mustafa Cemilev ile uyğunlaştıracağı aqta añlaştılar.
«Qırımnıñ Rusiye Fedaratsiyası tarafından vaqtınca işğal etilgeni ve bu sebepten Qırım Musulmanları Diniy idaresiniñ Qırım musulmanlarınıñ menfaatını serbest bildirmege imkânı olmağanı sebebinden Qırım musulmanları aqqı ile bağlı olğan meselelerni Ukrainada Saudiy Arabistan elçihanesi Ukraina prezidentiniñ qırımtatarlarnıñ işlerinden vekâletlisi Mustafa Cemilev ve Qırımtatar Milliy Meclis reisi Refat Çubarov ile uyğunlaştıracaq», – yazdı Çubarov.
O şunı da qoştı ki, yarımadanıñ vaqtınca işğali şaraitlerinde Qırım musulmanlarınıñ ağır uquqiy ve içtimaiy-iqtisadiy vaziyetini nazarğa alıp, Saudiy Arabistan Qırımnıñ 200 seyyası içün Hacnıñ maliyeviy teminlevi Qırallığınıñ hayriye fondlarınıñ esabına ödenilmesini tüşünecek.
Qırımtatar Milliy Meclis reisi aytqanı kibi, körüşüv iştirakçileri ileride de Ukraina musulmanları ile bağlı daa bir qaç mesleatnı keçirmege añlaştılar.
