Cemaat qırımtatar telekanalınıñ açılmasına federal bücetinde 177 mln ruble ayırılğan, bunı aprel 14 künü brifing devamında Qırımnıñ rusiyeli başı Sergey Aksönov bildirdi, haber ete Krıminform.
Onıñ sözlerine köre, paranıñ berilmesi Rusiye baş nazir muavini Dmitriy Kozan ile uyğunlaştırıldı. Qırım baş nazir muavini Dmitriy Polonskiy ise yañı donatuvnıñ saylanılması ile oğraşa.
«177 mln ruble içine er şey kire – tehnika, studiya. Şimdi mütehassıslarnı qıdıralar. Esası – qırımtatarlarnıñ maiyetini bilgen, telekanalnıñ siyasetini şekillendirecek bir insannı tapmaq kerek», – dey Aksönov.
O şunı da qoştı ki, yañı telekanalğa yarıdmada Roskomnadzordan iş izni olmağanından sebep işini toqtatqan ATR teleşirketiniñ jurnalistleri de kele bile.
«Qırımnıñ Rusiye Federatsiyasına qoşuluvını tanımağan insanlar içün sıñırlav bar. Mütehassıslarnı çağıramız, mında bir mania yoq», – dey Aksönov.
Aprel 1-den itibaren ATR yayınını toqtattı. Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.
Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
