Qırımtatar halqınıñ aq-uquqlarını qorçalav komitetiniñ koordinatorı, Meclis azası Eskender Bariyevniñ sözlerine köre, yarımadada qalğan Rusiye akimiyetiniñ maqsadı – halqara nezaretçileri ile keçirilgen qanuniy saylavlarda saylanılğan qırımtatarlarnıñ temsiliy organlarını terroristik etip adlamaqtan ibarettir.
Bunı o Facebookta yazdı.
Onıñ sözlerine köre, buña aprel 14 künü Qarasuvbazar regional meclisi reisiniñ evinde keçirilgen tintüv nevbetteki delil ola.
«Qarasuvbazar regional meclisi reisi Mustfa Asabanıñ evine silânıñ gizli sürette qoyulması ile bağlı vaqia qırımtatarlarnıñ temsiliy organları – Meclis ve Qurultayğa qarşı küreşniñ nevbetteki basamağı ola», – dey o.
«Böyleliknen, halqara cemaatçılıqqa bir halqnıñ temsiliy organları ile degil, terroristler ile küreşkenini kösterecek olalar….», – dep qoştı Bariyev.
Berilgen malümatqa köre, Qarasuvbazar regional meclisiniñ reisi Mustafa Asabanıñ evinde aprel 14-te saba uquq qoruyıcılar tintüv keçireler. Qırımtatar milliy areketiniñ faali, Qurultay Merkeziy saylav komissiyasınıñ reisi Zair Smedlâyevniñ bildirgenine köre, uquq qoruyıcılar «fevral 26 işi» boyunca malümatnı qıdıralar.
Qırımtatar halqınıñ aq-uquqlarını qorçalav komitetiniñ reisi, Meclis azası Eskender Bariyev bildire ki, Rusiye uquq qoruyıcıları aprel 14-te Qarasuvbazar regional meclisiniñ reisi Mustafa Asabanıñ evinde tintüv keçirip, patronlarnı taptılar. Olarnı, Bariyevniñ aytqanına köre, özleri qoydılar.
Mustafa Asabanıñ evinde tintüv ekinci sefer keçirilmekte. Uquq qoruyıcılar 2014 senesi sentâbr 16-da da tintüv keçirgen ediler. O vaqıt, tintüv neticelerine köre, Asabanıñ qırımtatar milliy areketinen bağlı diniy risaleler alındı. Tintüvden soñ er kişini politsiyağa subet içün davet ettiler.
