Hakasiyadaki yanğın qurbanlarınıñ sayısı 32 insanğa qadar arttı. Bunı bazarertesi künü Rusiye Taqiqat komitetiniñ resmiy temsilcisi Vladimir Markin bildirdi.
«Taqiqatnıñ 23 elâk olğan kişi aqqında malümatı bar», – dedi o.
Hakasiya yanğınlarında ağır yaralanğan sekiz kişi Krasnoyars ülkesi hastahanesiniñ yanıq merkezinde buluna, dep bildirdi hastahaneniñ matbuat kâtibi İrina Koçetkova İnterfaks-Sibir agentligine.
Cumhuriyetniñ sağlıq saqlav naziriniñ muavini Natalya Kogannıñ aytqanına köre, 900-den ziden insan Hakasiya yanğınlarında zarar kördi. 800 kişi tedaviylevge yollandı. 102 insan hastahanege yatqızıldı. Olardan 77 kişi alâ da hastahanede buluna. Kogannıñ bildirgenine köre, dört kişiniñ alı pek ağır, 43 – orta ağırlı. Zarar körgenler arasında üç bala bar.
Aprel 14-yu Hakasiya Cumhuriyetinde yanğınlar neticesinde elâk olğanlarnı añmaq maqsadı ile matem künü olaraq ilân etildi. Böyle bir buyruqnı region yolbaşçısı Viktor Zimin imzaladı.
Bu künde nazirlik, hızmet reberleri, belediye yolbaşçılarına devlet bayraqlarını endirmege tevsiye etile. Teleradiokompaniyalar ve medeniyet müessiseleri eglence yayınları ve tedbirlerini lâğu etmeli.
