RBK Daily gazetasınıñ tedqiqleri neticelerine köre, Qırımnıñ Canköy şeeri Rusiyeniñ eñ faqır on şeeri arasında yedinci yerni aldı.
«Rusiyeniñ farqlı şeerlerinde yaşav derecesini qıyaslamaq içün bizler şeer sakininiñ aylığını asğariy maaş ile qıyasladıq (maalesef, Rusiye statistik hızmeti şeerdeki asğariy maaş malümatlarını derc etmey). Rusiyede qıyaslav 3,9 qatnı teşkil ete, 1990 senesi ise 4,5 qattan ziyade edi», – dep paylaşalar tedqiq ketişatınen neşirniñ jurnalistleri.
Canköy içün qıyaslav 1,75 qatnı teşkil etti (2012-2014 seneleri orta aylıqnen asğariy maaşqa köre).
«Qırım şeerleriniñ sakinleri eñ çoq zarar köreler, 2013 senesi aylıq asğariy maaşnıñ 2,4-ke yete edi, – bu Ukrainadaki yaşav şaraitlerinen bağlı edi. 2015 senesi yanvar ayından vaziyet eyileşti – 2,6 oldı. Amma kene de eñ fena netice. Qırımdan soñ İvanovskaya ve Smolenskaya vilâyetleri kele (2,7), andaki sanayı işletüv 25 yıl içinde 75 ve 47%-ğa eksildi», – dep qayd eteler neşirniñ jurnalistleri.
Faqat Qırımnıñ ukrain devrindeki 2014 senesi mart ayından evelsi olğan statistikası angi malümatlarına esaslana bildirilmey.
RBK malümatlarına köre, 2014 senesi Rusiye şeerlerindeki orta aylığı 36,8 biñ rubleni teşkil etti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
